DXLIII.
Munera parua ab amicis data sunt non
spernenda.
Senec tellis how þat when̛ þe disciples of Socrates come and broght hym̛ many giftis, he had a pure scolar þat hight Escharmes, þat come & offerd̛ hym̛ selfe vnto hym̛ and̛ said̛; "Sur, I giff you þe beste þing þat I hafe, þat is myne awn̛ bodye." & he said̛ þat oþer þat gaff hym̛ smaƚƚ giftis helde þer beste giftis behynde, & so wolde not he doo, bod he prayed his mayster to take þat pure gifte, & so labur it with aƚƚ his diligens, att it mott be better & fayrer for his sake. And his maister ansswerd̛ hym̛ agayn̛ & sayd; "I have tane a grete gyfte of þe bod if þou þinke þi selfe little, and giff þi selfe besylie for þine awn profett to do aƚƚ thyng at I command̛ the."
- ...Munera magna non debet dare vxor sine licencia viri. Infra de vxore.