DXXX.
Mulier luxuriosa.

Orosius tellis of one þat hight Semiramis, þat was burnand in lichorie & thristie in blude, made ane ordinans and a constitucion̛ þat for no maner of reuerens nor inceste þer sulde no lettyng be, bod at betwix þe fadur & þe moder & þer childer, als ofte as þaim lykid̛, it sulde be lefuƚƚ to hafe at do samen or for to hafe to wyfe or husband̛. So on̛ a tyme sho desyryd hur awn̛ son̛ to hafe at do with hur, and þer in despite he slew hur.