DXVII.
Mortis horror aliquos ad bonum
inducit.
We rede in `Libro de Dono Timoris,' when̛ þe kurk of Crepsie [Harl. MS. Cresby.] shulde be halowed̛, & for þat þai wolde take oute þe bodie of ane erle þat was berid̛ þer, þai fand̛ a tade sittand̛ on̛ his face knawand̛, & many wormys and serpentis, to so mekuƚƚ at aƚƚ þat þer was fled̛, aƚƚ bod a son̛ of his awn̛. And he come to it & saw it, & tuke hym̛ so mekuƚƚ þoght þerfor̛ þat he lefte aƚƚ his gude & tuke hym̛ to pouertie, & was so pure at efterward̛ he beggid̛ his meat. And so he perseverd̛ many day. So hym̛ happend̛ on̛ a tyme to com̛ vnto Rome, & þer he become a collear to gett hym̛ meat with, & he had no noder place to lig in bod vnder-nethe a grece in þe howse of a cardinaƚƚ. And þer he lay vnto he dyed̛, and made a gude end̛. And on̛ þe nyght when̛ he dyed̛, aƚƚ þe bellis of þe kurk̘ rang be þer one.
- ...Mortis timor reddit hominem tristem et cogitatiuum. Infra de timore, iij & iiij.
- ...Mortuis valent suffragia et orationes et oblaciones. Supra de missa, iij, et infra de suffragio, iij.