DXI.
Mors quantumcunque magnos humiliat.
Petrus Alphonsis [MS. Alphensis.] tellis how þat when̛ kyng Alexander was dead̛ & his tombe was gaylie made of sylver & of golde, in his palas þer gader in many philosophers. And ane of þaim said̛; "Alexander yisterday made tresur of golde and now it is evyn̛ contrarie, for golde makis tresur of hym̛." And þan̛ a noder said̛; "Yisterday wolde not aƚƚ þis werld̛ suffis vnto hym̛, and þis day for yerdis of grond̛ alonelie sufficis hym̛." And þan̛ þe thrid said̛; "Yisterday he had rewle of aƚƚ þe peple, and þis day þe peple hase rewle of hym̛." Than̛ þe iiij said̛; "Yisterday he myght hafe delyverd̛ many peple fro dead̛, and þis day, for aƚƚ his power, he mot [not] esshew dead̛." Than̛ þe v said̛; "Yisterday he led̛ a grete hoste, and today he is led of þaim & putt vnto beryaƚƚ." Than̛ þe sext sayd̛; "Yisterday he thristid̛ down̛ þe ertℏ, and þis day þe ertℏ þrustis hym̛ down̛." And þan̛ a noder said̛; "Yisterday þe peple dred hym̛ gretelie, and þis day þai sett right not by hym̛." And þan̛ a noder said̛; "Yisterday