CCCCXCV.
Misericordia impenditur inimico crucifixi
amore.
Cesarius tellis how in̛ Ducheland̛ þer [MS. þat.] was a knyght þat happend sla þe fadur of a noder knyght. So be chawnce his son̛ att was slayn̛ happend̛ to take hym̛ at slew his fadur. And he drew his swerde and wold̛ hafe taken̛ hym̛ and slayn̛ hym̛. And he feƚƚ on̛ kneis befor̛ hym̛ & said̛; "Sur, I beseke you, ffor His luff þat dyed on þe cross & had mercy of aƚƚ þis werld̛, þat ye wold hafe mercie on̛ me now." And with þies wurdis he was compuncte, & tuke hym̛ vpp̛ & sayde vnto hym̛; "Loo, in wyrshup̛ of þe holie cros, & for His sake þat dyed̛ þeron̛, at He may forgyf me my synnys I forgyff þe, not alonelie þe truspas at þou hase done vnto me, bod from̛ hens furtℏ I shaƚƚ be þi frend̛." And with þat he tuke hym̛ abowte þe nekk̘ & kyssyd̛ hym̛. And with-in a little while after, þis same knyght burnyd̛ hym̛ with þe cros & went vnto þe holie land̛. And when̛ he come at þe kurk̘ of þe sepulcre of our̛ Lord̛, he went in-to it as other did̛. And, at aƚƚ folk saw, þe ymage of þe crucifix bowed̛ evyn̛ down̛ & lowtid̛ vnto hym̛. And when̛ þai at saw vnderstude not vnto whome he did̛ it, þai aƚƚ went aforn̛ þe rude ilkone after oþer. And itt inclynyd vnto none of þaim bod vnto hym̛. And þai axked hym̛ what was þe cauce, and he tolde þaim aƚƚ as is aforn̛ sayd.