CCCCLXXXIX.
Miles punitur et saluatur.
Cesarius tellis how on̛ a tyme þer was a knyght of Saxon̛, þat was cled in new skarlett clothes, and on̛ a day as he was rydand̛, he mett a husband̛-man̛ dryvand̛ his carte. And with þe sprenclyng & dasshyng of þe whelis, þis knyghtis clothis war al todasshid̛ with myre. And þis knyght, as a prowde man̛ & a tyrand̛, drew hys swerd̛ & smate of þe ta legg of þis husband̛ be his kne. So afterward̛ þurgh þe grace of God̛ he wex sorowfuƚƚ for his syn̛, & made hym̛ a monk̘ of þe Seustus ordur. And with-in a few yeris after he was made monke, þer began̛ to brede a sur like a sylk threde in his legg, on̛ þe same syde & in þe same place whar he cutt of þe husbandman̛ legg. And be little & little it began̛ to rote, so þat att þe laste mawkis bred̛ þerin. And þan̛ he wex fayn̛ & sayd̛; "Now I trow for to hafe forgyfnes, ffor I se on̛ my body þe syngne of Iob." And so he liffid̛ many day in grete contricion̛, and at þe laste, þurgℏ þis maledie, he dyed̛ & yeldyd̛ God a gude sawle.