CCCCLXXIII.
Martini, Episcopi et Confessoris.
Seuerus [MS. Severius.] in his 'Dialoggis' tellis how on̛ a ffestiuaƚƚ day a pure nakid̛ man̛ folowid̛ Saynt Martyn̛ vnto þe kurk-ward̛, and he commandyd̛ his archedekyn̛ to garr hym̛ be cledd̛, and he lachid̛ þerin. And Saynt Martyn̛ saw þat, & went in-to his secretorie & doffid̛ his cote & gaff it vnto þis pure man̛, and bad hym̛ go faste his wayis þerwith. And þan̛ þe archdekyn̛ desyrid̛ at he wold̛ go to mes, & he, spekand̛ of hym̛ selfe, said̛ þat he mot not go to mes vnto þis pure man̛ was cled̛. And so in a tene þis archdekyn̛ went in-to þe markett & boght a sary old̛ cote for vd̛, & broght it vnto Saynt Martyn̛ & said̛ he cuthe not fynd̛ þis old̛ pure man̛. And Saynt Martyn̛ bad hym̛ giff hym̛ þe clothe, & þe pure man̛ suld̛ nott want itt. And in a tene he threw it vnto hym̛, and he tuke it & went privalie & gatt it on̛ hym̛, & þe slevis þerof come bod vnto his elbow, & þe lenthe þerof was bod vnto his kne; and so he went vnto mes. And as he was att mes, a byrnyng globe aperid̛ abown̛ his head̛, whilk þat many folk saw, and for þat he was callid̛ Par Apostolis, Evyn̛ vnto þe Apostels. And vnto þis meracle addid̛ maister Iohn̛ Beletℏ, and says þat when̛ he was at mes and sulde lifte, as þe vse is, his lyn̛ slevis slafe bakk, & his armys was bod smaƚƚ, and þe slevis of þe olde cote come bod vnto his elbow, and so when̛ he liftid̛, his armys war bare. And þan̛ a mervalos wrethe of golde & precious stonys was sene aboute his armys, þat coverd̛ his armys vnto his elbow.
- ...Martinus eciam inuitis beneficia prestitit. Supra de invitis MS. inimicis. .