The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Som tyme þer was a non̛ þat hight Betres, a passand fayr womman̛, & sho was sacristan̛ of þe kurk̘ and sho had grete deuocion̛ vnto our Ladie; and oft sithis men̛ desirid̛ hur to syn̛.
So at þe laste sho consentid̛ vnto a clerk̘ at go away with hym̛ when̛ complyn̛ was done, and or sho yode sho went vnto ane altar of our̛ Ladie & said̛ vnto hur; "Lady, as I hafe bene deuoute vnto þe, now I resigne vnto þe þies keyis, for I may no langer susteyn̛ þe temptacion̛ of my flessℏ." & sho laid̛ þe keyis on̛ þe altar & went hur wayes vnto þe clerk̘. And when̛ he had defowlid̛ hur, with-in a few dayes he lefte hur & went away; & sho had nothyng at liff on̛ & thoght shame to gang home agayn̛ vnto hur clostre, and sho feƚƚ to be a common̛ woman̛. And when̛ sho had liffid̛ in þat vice xv yere, on̛ a day sho come vnto þe nonrie yate, & askid̛ þe porter if he knew evur a non̛ in þat place þat hight Betres, þat was sacristan̛ & keper of þe kurk̘. And he said̛ he knew hur on̛ þe beste wyse, and said̛ sho was a wurthi womman̛ & a halie of barn̛ little, "& euer hase kepud hur clene & in gude name." And sho vnderstode not þe wurdis of þis man̛, & went hur wayis. And our̛ Lady apperid̛ vnto hur & said̛; "Behold̛! I hafe fulfillid̛ þine offes þis xv yere, and þerfor̛ turn̛ agayn̛ now into þi place & be agayn̛ in þine offes as þou was, & shryfe þe & do þi penance, for þer is no creatur her̛ at knowis þi truspas, for I hafe euer bene for the in þi clothyng & in þine abbett." And onone sho was in hur abbett & went in & shrafe hur & did̛ her panance, and told̛ aƚƚ þat was happend̛ vnto hur.