The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Ther̛ was som̛ tyme in a cetie a passand̛ curios barbur, and for euer-ilk man þat he shufe he tuke a peny, and at þe weke-end̛ he mot pay for his burd̛ & putt in his purs ij or iij shelyng. So hym̛ happend̛ on̛ a tyme to here teƚƚ of a noder cete þat barburs tuke for ilk man̛ shavyng in a shelyng, and he tuke his instrumentis
with hym̛ & þoght he wolde go dweƚƚ þer. Not-withstondyng, or he went, aƚƚ þat evur he gatt of his wynnyng he spendid it & made hym̛ mery þerwith. So he come vnto þe toder cetie & sett vp his crafte, & on̛ þe furste day he gatt mekuƚƚ money. And he was fayn̛ þerof & wente vnto þe bowcherie & thoght to by hym̛ flessℏ vnto his supper, & it was spitefuƚƚ dere, and so with-in a while he conseyvid̛ þat, if aƚƚ he tuke neuer so mekuƚƚ for a mans shavyng, yit his meat & his drynke koste so mekiƚƚ þat he mot not spare no syluer bod spendid̛ it euer as he gatt it. And þan̛ he vmthoght hym̛ & said̛ vnto hym̛ selfe; "I spend aƚƚ my wynnyng of my meatt & my drynk & can̛ not safe a peny, þuf aƚƚ I take a shelyng for a shavyng, and when̛ I tuke bod a peny for a shavyng, I couthe wele spar som̛ syluer euer-ilk day, & now I can̛ not so, for here I may not get my lyfelod̛." And he gatt his gere to-gedur & went agayn̛ vnto þe toder cetie & right not in his purs.