Alphabet of tales : an English 15th century translation of the Alphabetum narrationum of Etienne de Besançon, from Additional MS. 25,719 of the British Museum / by Etienne de Besançon

CCCCIV.
Iracundus naturaliter eciam solus existens irascitur.

We rede in 'Vitis Patrum' how som tyme þer was a brother þat was passand̛ angrie in hym̛ selfe. So on̛ a tyme he said̛ vnto hym̛ selfe; "Þou bodie! & þou war be þine ane, þou sulde not be so ofte movid̛ vnto angrynes." So he went vnto wildernes & liffid be hym̛ selfe. & on̛ a tyme he tuke a little pott & fillid̛ itt fuƚƚ of watyr, and he turnyd̛ vp þe pott & powrid̛ it oute. So þe secund̛ tyme he fyllid̛ it & wex angrie & powrid̛ it oute agayn̛; and þan̛ he wex so tene þat he tuke þe vesseƚƚ & brakk it aƚƚ to gobettis. And þan̛ he come vnto hym̛ selfe & knew þat he was stirrid̛ to wratℏ be a fend̛. And þan̛ he said̛; "Lo! þuff aƚƚ

I be be myne ane, neuer-þe-less I am̛ ouer-commen̛ with angrynes." And þan̛ he turnyd̛ agayn̛ vnto his felashup̛; for whar̛ þer is labur & felashup̛ commonlie þer is paciens & Goddis helpe.