CCCXCVII.
Invidus in morte eciam non cessat.
Cesarius tellis þat when̛ þe Duke of Siringie was deade, þer was harde a voyce besyde þe Mownt of Tybir [Arund. MS. Montem Geber. Harl. MS. Montem Ciber.] , þat spat fyre, & it sayd̛; "Ordand fyre!" And a noder voyce ansswerd̛ & sayd; "I wote neuer whatt, nor to whame I saƚƚ ordan̛." And þe toder said̛ agayn̛; "Our gude & wele-beluffid̛ frend̛, þe Duke of Siringie, commys hedur." And onone it was knawn̛ þat in þe Empyre of Frederyke, vnto whome þies war̛ wreten̛, þe same day & howr̛ was Bertolfus [Lat. MSS. Bertoldus.] , þat was Duke of Siringie, dead̛; þat was a grete tyrand and a robber bothe of riche men̛ & pure men̛. And for als mekyƚƚ as he had no child̛, or he dyed̛ he prayed̛ þat aƚƚ his tresurs, þat war of grete valow, mott be molten̛ in-to a grete mace, & sayd̛ vnto hym̛ selfe; "I gnaw weƚƚ at my cussyns wiƚƚ be fayn̛ of my dead̛; and if þai fynd̛ me tresurs, sone þai wiƚƚ devide þaim emang þaim. And if þai be aƚƚ in a grete lompe þai er noght ethe to parte emang þaim." et c̛.