CCCLXXIV.
Iterum Iacobi.
We rede in his 'Meracles' how þat a Duche-man̛ & his son̛, abowte þe yere of our̛ Lord̛ M ƚ xx, went vnto Saynt Iamys. And in þe cetie of Thososti [Lat. MSS. in urbe Tolosa.] a syluer pece was put in his skripp̛ [MS. skipp̛] privalie, at he wiste not off; and on̛ þe morn̛ þai went þer wayis. And þer oste folowed þaim & tuke þaim as thevis; & he oppynd̛ þer skrip̛, & onone he fande þis syluer pece, and þan̛ þai war broght befor̛ þe iuge. & onone þe sentans was giffen̛ þat aƚƚ þat þai had sulde be giffen vnto þer oste. & þe tane of þaim was demyd to be hangid̛, & þe fadir wold̛ hafe dyed̛ for þe son̛, & þe son̛ for the fadur; bod neuer-þe-les þe son̛ was hanged̛. And þe fadur made grete sorow & went his ways on̛ to Saynt Iamys. And xxxvj dayes he come agayn̛ þer away, & come vnto þe galos þer his son̛ hang, & wepid̛ & made mekle sorow. And his son̛, þat hang, spak & began̛ to comfurtℏ hym̛, & said̛; "Swete fathir! Wepe noght! ffor it was neuer so wele to me; ffor Saynt Iamys beris me yit vp̛, & fedis me with hevynlie swetnes." And when̛ þe fadur hard þis, he ran̛ vnto þe cetie & tolde þe pepuƚƚ how it was; and þai come & tuke down̛ þis pylgrem̛ son̛ hale & sownd̛. & þan̛ þai tuke his oste & hanged hym̛, when̛ he had grauntid how he had done.