CCCLVII.
Histriones aliquando maliciose se
vindicant.
Iacobus de Vetriaco tellis how som̛ tyme þer was ane abbott of Ceustus ordur; and when̛ he was a monke, he was a passand hard̛ man̛, & a sparand̛. So hym̛ happynd̛ be made hosteler̛, to kepe gestis in þer ostrie, afor̛ he was made abbott. So on̛ a tyme þer come vnto þis abbay on̛ a day a mynstraƚƚ, & was sett in þe ostrie att dyner. And þis monke servid̛ hym̛ of passand̛ gray bread̛, & thyn [MS. thyng.] potage, & a little salte; & he had no drynk bod watir. & at evyn̛ he was layd̛ in a uyƚƚ bedd̛, & a hard̛. And opon̛ þe morn̛ þis mynstraƚƚ was iƚƚ plesid̛, & vmthoght hym̛ how þatt he mott venge hym̛ on̛ þis monke at had servid̛ hym̛ so evuƚƚ. So as he went furth of his chamber þer he lay, hym̛ happend̛ to mete with þe abbot, and þis mynstraƚƚ come vnto hym̛ & haylsid̛ hym̛, and said̛; "My lord̛, I thanke you & your wurthie covent of grete cher̛ at I hafe had here, & of grete coste þat I hafe taken̛ of you; ffor yone gude liberaƚƚ monke, your hostley, servid̛ me yistrevyn̛ at my supper wurthelie, with many dyvers costious mece of ffissℏ, & I drank̘ passand̛ gude wyne. And now, when̛ at I went, he gaff me a payr̛ of new butis, & a gude payr of new knyvis, and a poynt to hym̛ þaim with."