Alphabet of tales : an English 15th century translation of the Alphabetum narrationum of Etienne de Besançon, from Additional MS. 25,719 of the British Museum / by Etienne de Besançon

CCCXLVIII.
Gule peccatum quam detestabile sit visibiliter deus ostendit.

Cesarius tellis how þer was som tyme monkes þat war prestis, and opon̛ þe fastynggang evyn̛ þai satt etand̛ & drynkand̛ in a prest howse vnto mydnyght; and at mydnight þai satt stiƚƚ & ete on̛ as þai had nevur etyn̛ a morseƚƚ. And so when̛ cokkis krew & þai war bown̛ at ryse, þe gudeman̛ of þe howse sayd̛; "Yit we wiƚƚ not parte or we ete somwhatt." & he bad his servand̛ feche þaim a [After a, rostid̛, erased.] hen̛, "þe beste at þou fyndis sittand̛ next þe kokk̘, & sla hur & roste hur." And he went & fechid̛ hur, & slew hur & skaldid̛ hur & oppend̛ hur. And when̛ he putt in his hand̛

att draw hur, he went he had drawen̛ furtℏ aƚƚ hur guttis, & he drew oute a gre[te] whik tade. And with þat he gaff a grete cry; and þai come aƚƚ & luked̛ whatt hym̛ ayled̛. And he lete þaim se; and when̛ þai saw att þe hen̛-bowels was turnyd̛ in-to a whik tade, þai vnder-stude at þai had servid̛ þe Devuƚƚ & displesid̛ God̛, & þai were aƚƚ confusid̛ & went þer ways. et c̛.