CCCXXXVIII.
Gaudium quandoque nocet corpori.
We rede in þe 'Storie of Aprocryfattis [Lat. MSS. Historia Apocriphi.] ' of Titus and Vespacyan̛, how þat when Titus hard̛ teƚƚ þat his fadur Vespacian̛ was made Emperour, he was strykyn̛ with such a ioy and a comfurtℏ, þat he was shronken̛ aƚƚ his synowes to-gedur in a lumpe, as it had bene with a crampe. And Iosephus hard̛ teƚƚ how he was þus fallen̛ seke, & serchid̛ þe cauce of his sekenes, & þe tyme at it tuke hym̛ in. And he conseyvid̛ at he tuke it with a hertelie ioy and a comfurtℏ þat he tuke when̛ he hard̛ teƚƚ of þe sublimacion̛ of his fadur. And þan̛ he vmthoght how þat a sekenes may be curid̛ with þe contrarie, & he garte spur if þer war̛ any man̛ þat Titus was wrothe with, or grevid̛ agayn̛, or þat he wold̛ not suffer com̛ in his sight. And belyfe þai told̛ hym̛ of one [Lat. MSS. et erat ibi seruus adeo Tito molestus, ut sine uehementi turbacione nulla tenus in ipsum respicere posset.] . And þan̛ he come to Titus & sayd̛; "And þou desyre to be hale, þou bus pardon̛ & suffer aƚƚ þaim þat commys in-to þi presens with me." And Titus grawntid̛ at he suld̛ so do. And Iosephus garte sett a burd̛ in þe chawmer anence his bed̛, and he garte Titus be sett att meatt at þe burd̛-end, in a chayr, & he sett þis servand̛, at he was so wrothe with, on̛ his right hand̛, & himselfe on̛ his lefte hand̛. And Titus saw at it was þis man̛ at he was wrothe with, & remembred̛ hym̛ how þat he mott say nothyng