CCCXXXV.
Furtum non potest celari.
We rede in 'Legenda Sancti Patricij' how som̛ tyme þer was a man̛ at stale his neghbur shepe, & ete it; and þis man̛ at aght þis shepe come vnto Saynt Patryk, & told̛ hym̛ how a shepe was stollen̛ from̛ hym̛: & he chargid̛ oft sithis þat who som̛-evur had̛ it sulde bryng it agayn̛, and no man̛ wolde grawnte it. So on̛ a haly day, when̛ aƚƚ þe peple was in þe kurk̘, Saynt Patrik spirrid̛ & commandid̛, in þe vertue of Iesu, at þis shepe sulde blete in his belie þat had etyn̛ itt, at aƚƚ men̛ might here. And so it did̛; & þus þe thefe was knowen̛, & made amendis for his trispas. And aƚƚ oþer þat hard̛ euer after was ferd̛ to stele.