CCCV.
Episcopus a sanctis accusatur.
We rede in 'Libro de Dono Timoris,' how þer was in þe cetie of Turan̛ a gude man̛; and he vsid̛ of costom̛ to com̛ on̛ þe night to matyns vnto þe cathedraƚƚ-kurk þer. So on̛ a tyme hym̛ happend̛ com̛ tymelie, & he fand̛ þe yatis opyn̛, & he saw a grete light in þe kurk̘, & a iuge syttand̛ in a trone. And hym̛ þoght þer come Saynt Martyn̛ & many oþer Saynttis with hym̛, and accusid̛ þe archbisshopp̛ of þe same kurk̘, & he was cityd̛ & come. And he was sett in a chayr in his pontificaƚƚ aray, and he was grevuslie accusid̛ and wold̛ giff none ansswer, to so muche þe iuge wex wrotℏ with hym̛, & smate þe chayre & hym̛ bothe owr̛ with his fute. & with þat þe vision̛ vanysshid̛ away, & þis gude man̛ went vnto þe bisshoppis place, & spirrid̛ how þe bisshop̛ did̛; & his meneya went in-to his chawmer & lukid̛, and fand̛ hym̛ stark dead̛ in his bed̛ sodanly.