CCLXVIII.
Deus omnia videt.
Petrus Damianus tellis how on̛ a tyme þer was a man̛ þat stale his neghbur sew; and þis man̛ at stale þis sew was a man̛ þat luffid̛ wele to herber pure folk. So on̛ a tyme our̛ Lord̛ apperid̛ vnto hym̛ in lyknes of a pure man̛; & he was lang-harid̛, & he prayed̛ hym̛ þat he wold̛ for charite cutt it shorter. And with gude wiƚƚ he welcomd̛ hym̛ & sayd̛ he wold̛, aƚƚ redie; & he garte hym̛ sett hym̛ down̛, & tuke a payr of sisurs and began̛ to clypp hym̛ before. And in þe hynderparte of his head̛ he fand̛ ij privay een̛ lurkand̛; and he had grete mervaƚƚ þerof & askid̛ hym̛ whi þai war þer. And he ansswerd̛ & sayd̛; "I am̛ Iesus, þat seis our aƚƚ þis werld̛, and þies er þe een̛ whar̛-with I saw þi neghbur sew at þou stale, & slew it & hyd̛ it in a cafe." And with þat he vanysshid̛ away. And þis man̛ amendid̛ hym̛ & made restitucion̛ privalie for hur vnto hym̛ att aght hur, be advice of his confessur.
- ...Dileccio. Supra, sicut de amicicia et amore.