CCLIX.
Demonis forma est terribilis.
We rede in 'Libro de Dono Timoris,' how þer was a religious man̛ þat lay in his dortur with his brethir, and sodanlie as [he] lay, he began̛ to cry vgsomlie. And þe covent rase and come vnto hym̛; and þai fand hym̛ glorand̛ faste agayns þe waƚƚ, & he wolde speke no wurd̛, bod he was evyn̛ as he had bene flayed̛. So in þe mornyng he come to hym̛ selfe, and þe [MS. þi.] priour askid̛ hym̛ what hym̛ aylid̛. And he said̛ at he saw þe devuƚƚ; "and his shap," he sayd̛, "was so vglie, it mot not be discryvid̛; bod I say þis," sayd̛ he, "þat & þer war a hate oven̛ on̛ þe ta side me, & þe shapp̛ of hym̛ on̛ þat other partie, me had levur crepe in-to þat hate oven̛ þan̛ ans behold̛ hym̛ agayn̛ as I did̛."