Alphabet of tales : an English 15th century translation of the Alphabetum narrationum of Etienne de Besançon, from Additional MS. 25,719 of the British Museum / by Etienne de Besançon

CCXXVII.
Crux Cristi vel crucifixus. Crucifixi ymago a Iudeis in despectu vulneratur.

We rede how þat in þe tyme of Constantyne þe iiij [Lat. MSS. In Siria, Ciuitate Bericho, Iudei ymaginem crucifixi inuenientes in domo cuiusdam Iudei, relictam ibi a quodam Cristiano qui ibi manserat, eam iniuriose doposuerunt. et cet.] , þe Iewis fand̛ in a cetie ane ymage of þe crucifix; & þai broght it into a Iewis hows, & [MS. repeats, &.] þer þai spitt þeron̛ & strake it with þer handis, & naylid̛ þe fete þerof vnto þe cros with naylis, & þai put vnto þe mouthe þerof ayseƚƚ & gaƚƚ. And at þe laste þai oppend̛ þe syde þerof, & þer come blude & watir; and þai sett ane ampuƚƚ vndernethe it & kepyd it in. And ilkone of þaim att was seke, þai wold̛ sprencle of þis blude on̛ þaim, & onone þai war hale. So at þe laste þies Iewis forthoght att þai had done, and tuke þis ymage

& þe blude, & had it vnto þe bisshopp̛ of þe cetie; and so þai wer cristend̛ & turnyd̛ vnto þe faytℏ. And of þis blude was sent to many cetis & kyngdoms; & yit to þis day it duse many meracles.