CXCVII.
Constans debet esse religiosus in omnibus, tam
prosperis quam aduersis.
Cesarius tellis of a monk of þe same ordur, þat did̛ many grete meracles. So his abbott askid̛ hym̛ on̛ a tyme, how he had þat grace befor̛ aƚƚ his brethir to do so many meracles. And he ansswerd̛ agayn̛ & said̛; "I wote nevur, for I pray no more, nor fastis no more, nor wakis no more, þan̛ duse myne other brether, nor laburs no more; bod I know [After know, n and some other letter, blotted.] a thyng. Ther may no prosperite make me prowd̛, nor none aduersitie make me displesid̛ nowder of my selfe nor of oþer." And þe abbod̛ askid hym̛ & said̛; "Was þou not trubbled̛ when̛ suche a knyght byrnyd̛ our grange?" And he ansswerd̛ agayn̛ & sayd̛; "Nay! for I betaght þe reward̛ þerof vnto almighti God̛; and wheþer I hafe mekuƚƚ or little, euer I thank̘ allmighti God þerof, & takis it with gude wiƚƚ, ffor I hafe dispysed̛ & forsaken̛ aƚƚ þe riches of þis werld̛." et c̛.
- ... Constans debet esse prelatus in hijs que pertinent ad officium suum. Supra Ambrosij. vj.