X.
Abbas in vestibus et in calciamentis humilem se debet ostendere.

We rede of ane Abbott off Ceustus ordur, how he on̛ a tyme come vnto Philipp̛, þat was kyng of Romayns, for dyvers nedis of his howse, for to speke with hym̛. So þe kyng beheld̛ his hose & his shone, & þai war passand strayte & clenlie done vppon̛; and when̛ he had con[s]ydurd þis, he askid̛ þis abbott of whyne he was; and þis abbott ansswerd̛ hym̛ agayn̛ & sayd, "Sur, I am̛ abbott of a fuƚƚ pure howse." And þan̛ þe kyng said̛ agayn̛ vnto hym̛, "Sur, þat semys wele be your̛ hose & your̛ shone þat your howse is made passand pure, for þai er costios & dere." And with þis wurd̛ þis abbott was confusid̛, & neuer after ware so costios hose nor shone, nor so strayte as he did befor̛.