CII.
Basilius veniam pro peccatis mulieri impetrauit.
We rede how þer was a womman̛ þat wrate aƚƚ hur synnys in a byƚƚ; and emangis aƚƚ oþer sho wrate a grete syn̛ at sho had done, & þis byƚƚ sho delyverd̛ vnto Saynt Basyƚƚ & prayed hym̛ to pray for hur þat hur synnys myght be forgiffen̛ hur. And he sett hym̛ down̛ on̛ his kneis & made his prayers for hur. And þan̛ he oppynd̛ þis byƚƚ, & þis womman̛ with hym̛, and aƚƚ hur synys war away, out-take þis grete syn̛. And þan̛ sho prayed̛ hym̛, þat as he with his prayers had getten̛ hur forgifnes of aƚƚ hur oder synys, at he wold̛ so pray for hur att sho mott be forgiffen̛ of þat syn̛. And he bad hur go away from̛ hym̛, & sayde he was a synner & mysterd̛ forgyfnes of his syn̛ als wele as sho did̛. And sho wolde nott away, bod abade stiƚƚ criand̛ on̛ hym̛ to pray for hyr [MS. hym̛.] . And he bad hur go vnto Saynt Effrem̛, & he myght grawnt hur at sho askid̛. And when̛ sho come att Saynt Effrem̛ & told̛ hym̛, he sent hur agayn̛ vnto Saynt Basyƚƚ & bad hur go fast, at he wer nott dead or sho come. And when̛ sho come, men̛ was berand̛ hym̛ vnto his grafe. And þan̛ sho began̛ to cry & said̛; "aƚƚ-myghti God deme betwix þe & me; for when̛ þou might hafe prayed for me, þou sent me