And with þat word / the arwes in the caas
Of the goddesse / clateren faste and rynge
And forth she went / and mad a vanasshynge
Line 2360
ffor which this Emelye / astoyned was
And seide / what amountith this / allas
I putte me / in thyn proteccion
Diane / and in thyn disposicion
Line 2364
And hom she goth a-non / the next wey
This is the effect / there is no more to sey
¶ . The next houre / of Mars / folwyng this
Arcite / vn-to the temple / walked is
Line 2368
Of fiers Mars / to don his sacrefice
with alle the rightes / of his payen wyse
with pitous hert / and hie deuocion
O Ryght thus to Mars / he seid his orison
Line 2372
Strong god / that in the regnes cold
Of Trace / honoured art / and god I-hold
And hast in euery regne / and euery lond [folio 31a]
Of armes / alle the brydeles in þin hond
Line 2376
And hem fortunest / as the list deuyse
Accepte of me / my pitous sacrifise
If so be / that my ȝouthe / may deserue
And þat my myght / be worthy for to serue
Line 2380
Thyn godhed / that I may be on of thyne
Than preye I the / to rewe vp-on my pyne
ffor thilk pyne / and thilk hote fyre
In which / þou whilom / brendest for desire
Line 2384
whan that þou vsedest / the beaute
Of fair ȝong and fressh / Venus fre
And haddest hire in armes / at thy wylle
Al-though the ones / on a tyme mys-felle
Line 2388
whan Vulcanus / had caught the in his laas
And fond the liggynge / by his wyf / Allas
ffor thilk sorwe / that was tho in thyn hert
Haue reuthe as wel / vp-on my peynes smert
Line 2392
I am ȝong / and vnkonyng / as þou wost
