And ȝete it were / a game / to heren al [folio 30a]
To him þat meneth wel / it were no charge
But it is good / a man ben at his large
Line 2288
hire bright heer was kembed / vn-tressed all
A corone of a grene Oke / seriall
Vp-on hire hed was set / ful fair and mete
Two fires vp-on the auter / gan she bete
Line 2292
And dide hire thynges / as men may byholde
In stace of Thebes / and othere bokes olde
whan kynled was the fyr / with pytous chere
Vn-to Diane she spak / as ȝe may here
Line 2296
O chast goddesse / of the wodes grene
To whom / bothe heuen / erthe / and see / ys sene
Quene of the regne of Pluto / Derk and lowe
Goddesse of Maydenes / that myn hert hast knowe
Line 2300
fful many a ȝere / and wost what I desire
As kepe me fro thy vengeaunce / & thyn Ire
That Antheon / a-bought cruelly
Chaste goddesse / wel wost thow that I
Line 2304
Desire to be a Mayden / al my lif
Ne neuere wyl I be / no loue / ne wyf
I am þou wost ȝet / of thy companye
A Maide / and loue huntyng and venerie
Line 2308
And for to walken / in the wodes wyld
And nat to ben a wyf / & be with child
Nought wol I knowe / companye of man
Now help lady / sith ȝe may and kan
Line 2312
ffor tho thre formes / that þou hast in the
And Palamon / that hath swich loue to me
And eke Arcite / that loueth me so sore
This grace I preye the / with-oute more
Line 2316
As send loue and pes / betwix hem two
And fro me turne a-wey / here hertes so
That al here hot loue / and here desire
And alle here besy turmenteȝ / and here fire
Line 2320
Be quenched / and turned / in a-nother place
