He rod to wenden / on his pilgrimage
Vn-to the blisseful / Sitheria benigne
I mene venus / honurable and digne
Line 2216
And in hire houre / he walketh forth a paas
Vn-to the lystes / there hire temple was
And doun he kneleth / and with humble chere
And herte soor / he seide as ȝe shuln here
Line 2220
Fairest of fair / O lady myn / venus
Doughter to Ioue / and spouse to vulcanus
Thow glader / of þe mounte of Scitheron
ffor thilke loue / þou haddest / to Adoon
Line 2224
Haue pyte / of my bytter teres smerte
And take myn humble preyer / at thyn herte
Allas I ne haue / no langage to telle
The effect / and the turmentȝ of myn helle
Line 2228
Myn hert may nat / myn harmes bywrye
I am so sorweful / that I can nat seye
But mercy lady bright / that knowest wele
My thought / and seest what harmes þat I fele
Line 2232
Considre al this / and rewe vp-on my sore
As wysly / as I shal for euere more
Perfourmyng be my myght / thy trewe seruaunt to be
And holden werre alwey / with chastite
Line 2236
That make I myn a-vow / so ȝe me helpe
I kepe nat of armes / for to ȝelpe
Ne I ne ask nouȝt to-morwe / to han victorie
Ne renon in this caas / ne veyn glorie
Line 2240
Of prys of armes / blowen vp and doun
But I wold haue fully / possession [¶ nota bene]
Of Emelie / and dye in thy seruyse [folio 29b]
ffynde þou the maner / & in what wyse
Line 2244
I recche nat / but it may better be
Than victorie / of hem / or they of me
So that I haue my lady / in myne armes
ffor though so be / that Mars is god of armes
Line 2248
Ȝoure vertu is so gret / in heuene a-boue
