This is to seyn that whether he or thow
May with his .C. as I spake of now
Sleen his contrarye or out of lystes dryve
Than shall I yeve Emelye to wyve
Line 1860
To whom that fortune yeveth so feire a grace
The lystes shall I maken in this place
And god so wysly on my soule rewe
As I shall even Iuge been and trewe
Line 1864
Ye shall none other ende with me maken
Þat that one of you ne shall be dede or taken
And you think that this be wele ysayde
Seith your avys and holdeth yow apayde
Line 1868
This is your ende and your conclusyon
Who loketh lightly now but palamon
Who spryngeth for ioy but Arcite
Who kouth telle or who kouth it endite
Line 1872
The ioy that is maked in the place
Whan Theseus hath done so feire a grace
But doun on knees went euery maner wight
And thonked him with all her hert and might
Line 1876
And namely the Thebans oft sythe
And thus with gode hope and hert blythe
They take her leve and homeward gon they ryde
To Thebes with his olde walles wyde
Line 1880
[PART III. No gap in the MS.]
i trowe men wolde deme yt necgligence
Yf I foryete to tellen the dispence [Eg. 2726 folio 24b]
Of Theseus that gothe so besely
That maken vp the lystes roially
Line 1884
That soch a noble teatre as yt was
I dare wele seyn in this world there nas
The circuite a myle was aboute
Walled of stone and dyched all with-oute
Line 1888
Rounde was the shap in manere of a compaas
