[6-text p 542]
(60)
¶ But they conuerted / at hire wyse loore
Line 414
Wepten ful sore / and ȝauen ful credence
vn-to hire word / and cryden moore & moore
Crist goddes sone / with-outen difference
Line 417
Is verray god / this is al oure sentence
That hath so good a seruaunt / him to serue
This / with o vois / we trowen / though we sterue
Line 420
(61)
¶ Almachius / that herde of this doynge
Line 421
Bad fecchen Cecile / þat he myghte hire se
And alderfurst lo / this was his axynge
What maner womman / artow quod he
Line 424
I am a gentil womman / born / quod she
I axe the quod he / though it the greeue
Of thy religion / and of thy byleue
Line 427
(62)
¶ Why thanne bygan / ȝoure question folily
Line 428
Quod she / þat woldest two answeres conclude
In oo demaunde / ȝe axed lewedly
Almache answerde / vn-to þat similitude
Line 431
Of whennes cometh / thyn answeryng so rude
Of whennes quod she / whan þat she was freyned
Of Conscience / and of good feith vnfeyned
Line 434
(63)
¶ Almachius seide / ne takestow noon heede
Line 435
Of my power / and she answerde him this
Ȝoure myght quod she / ful litel is to drede
ffor euery mortal mannes power / nys
Line 438
But like a bladdre / ful of wynd I-wys
ffor with a nedles poynt / whan it is blowe
May al the boost of it / be leid ful lowe
Line 441
