[6-text p 538]
(44)
¶ Tiburce answerde / and seide Brother deere
Line 302
ffirst telle me / whider þat I shal / & to what man
To whom quod he / come forth with right good cheere
I wol the lede / vn-to the Pope vrban
To vrban / Brother myn valerian
Line 306
Quod tho Tiburce / woltow me thider lede
Me thynketh / that it were a wonder dede
Line 308
(45)
¶ Ne menestow nat vrban / quod he thoo
Line 309
That is so ofte dampned / to be ded
And woneth in halkes / alwey to and froo
And dar nat oones / putte forth his hed
Men shulde him brennen / in a fyr so red
Line 313
If he were founde / or þat men myght him spie
And we also / to bere him compaignye [folio 199b]
Line 315
(46)
¶ And whil we sekyn / thilke diuinitee
Line 316
That is I-hid / in heuene pryuely
Algate I-brent in this world / shuln we be
To whom Cecile answerde / boldely
Men myghten dredyn wel / and skylfully
Line 320
Thys lyf to lese / my owne deere brother
If this were lyuyng oonly / & noon other
Line 322
(47)
¶ But there is better lyf / in other place
Line 323
That neuere shal be lost / ne drede the nought
which goddes sone / vs tolde / thurgh his grace
That fadres sone / hath alle thynges wrought
And al þat wrought is / with a skilful thought
Line 327
The goost þat fro the fader / gan procede
hath sowled hem / with-outen any drede
Line 329
