[6-text p 533]
(24)
¶ This valerian / corrected as god wolde
Line 162
Answerde ageyn / if I shal trosten the
lat me that Aungel seen / & him biholde
And if that it / a verray Aungel be
Than wol I doon / as þou hast preyed me
Line 166
And if þou loue / a-nother man forsothe
Right with this swerd / than wol I slee ȝow bothe
Line 168
(25)
¶ Cecile answerde a-noon / right in this wyse
Line 169
If that ȝow list / the Aungel shuln ȝe se
So that ȝe trowe on Crist / & ȝow baptiȝe
Goth forth / to via apia / quod she
That fro this toun / ne stant but myles three
Line 173
And to the pouere folkes / þat there dwellen
Sey hem right / as that I shall ȝow tellen
Line 175
(26)
¶ Tolle hem that I Cecile / ȝow to hem sent
Line 176
To shewen ȝow / the goode vrban the olde
ffor secree nedes / and for good entente
And whan þat ȝe / seynt vrban han biholde
Telle him tho wordes / which I to ȝow tolde
Line 180
And whan that he / hath purged ȝow fro synne
Than shuln ȝe sen þat Aungel / er we twynne
Line 182
(27)
¶ This valerian / is to the place goon
Line 183
And right as he was taught / by hys lernynge
he fond this holy vrban / a-noon
A-mong the seyntes buriels / lotynge [id est latitantem]
And he a-noon / with-outen tariynge
Line 187
Dide his message / and whan that he it tolde [folio 198a]
vrban for ioye / his handes gan vp holde
Line 189
