[6-text p 532]
(20)
¶ And whil þat the Orgenes / maden melodye
Line 134
To god allone / in hire herte thus song she
O lord my soule / and eke my body gye
vnwemmed / lest þat I confounded be
And for his loue / þat deyde vp-on the tree
Line 138
Euery secunde / & thridde day she faste
Ay biddyng / in hire orisouns ful faste
Line 140
(21)
¶ The nyght cam / & to bedde must she goon
Line 141
with hire housbonde / as ofte is the manere
And pryuely / to him / she seide a-noon
O swete / and wel biloued / spouse deere [folio 197b]
There is a counseil / & ȝe wolde it heere
Line 145
which þat right fayn / I wolde vn-to ȝow seye
So that ȝe swere / ȝe shuln it nat biwreye
Line 147
(22)
¶ Valerian gan faste / vn-to hire swere
Line 148
That for no caas / ne thyng þat myghte be
He shulde neuere moo / bywreyen hire
And thanne at erst / to him seide she
I haue an Aungel / which þat loueth me
Line 152
That with gret loue / where so I wake or slepe
Is redy ay / my body for to kepe
Line 154
(23)
¶ And if that he may felen / out of drede
Line 155
That ȝe me touche / or loue in vileynye
he right a-non / wol sleen ȝow with the dede
And in ȝoure ȝouthe / thus ȝe shulden dye
And if that ȝe / in clene loue me gye
Line 159
He wol ȝow loue as me / for ȝoure clennesse
And shewe to ȝow his ioye / & his brightnesse
Line 161
