Than wold he speke no worde but latyn
A fewe termes hade he ij· or iij·
That he hade lerned out of som decre
Line 640
No wonder ys he herde yt all the day
And eke he knowe wele how þat a Iay
Kan clepe wat as wele as kan þe pope
But who so koude in other thinges hym grope [Eg. 2726 folio 9a]
Line 644
Than hade he spent all his felosophie
Ay questio quid Iuris wold he crye
He was a gentill harlot and a kynde
A better felaw shold men nowhere fynde
Line 648
He wold suffre for a quart of wyne
A gode felaw to haue his concubyne
A twelmonth and excuse hym atte full
ffull priuely eke a fynche koude he pulle
Line 652
And yf he fonde owhere a gode felawe
He wold tech hym to haue none awe
In swich cas of þe Archedekenes curs
But yf a mans soule heng in his purs
Line 656
ffor his purs he shold pyned be
purs is the Erchedekenes hell quod he
But wele I wote he lyeth right in dede
Of cursyng ought euery gilty man to drede
Line 660
ffor curs will slee right as assoylyng saueth
And also ware hym of a significaueth
In daungere hade he at his owen gyse
All the yong gerles of the diocyse
Line 664
And knewe her counseill and was all her rede
A gerlonde he hade set vp-on his hede
As grete as yt were for an ale stake
A bokeler hade he made hym of a cake
Line 668
Wyth hym there rode a gentyll pardonere
Of rouncyvale his felawe and his compere
That streight was come fro the court of Rome
ffull loude he song come hyder loue come
Line 672
This sumpnour bare to hym a styf burdon
