Bold was hire face / and feir & rede of hewe
She was a worthy womman / al hire lyue
housbondes at þe chirche dore / had she had fyue
Line 460
With-outen other companye / in hire ȝouthe
But ther-of nedeth nat / to speke of nouthe
And thries had she ben / at Ierusalem [folio 8b]
She had passed / many a straunge strem
Line 464
At Rome had she be / and at Boloyne
In Galice at Seynt Iameȝ / and at Coloyne
She coude meche / of wandryng by the weye
Gat-tothed was she / sothly to seye
Line 468
Vp-on an aumblere / esily she sat
Wel I-wympled / and on hire hed an hat
As brod as is / a bokeler or a targe
A fote mantel / aboute hire hepes large
Line 472
And on hire fete / a peire of spores sharpe
In felashippe / coude she / laughe & carpe
The remedies of loue / she coude per chaunce
ffor of þat art / she knew þe olde daunce
Line 476
A Good man þere was / of religion [¶ A Person]
That was a pore Person / of a toun
But riche he was / of holy thouȝt and werke
He was also / a lerned man / a clerke
Line 480
That cristes gospel / trewely wold preche
His parisshyns deuoutly / wold he teche
Benygne he was / and wonder diligent
And in aduersite / ful abidyng / and pacient
Line 484
ffor which he was preued / often sithes
fful lothe were him to curse / for his tithes
But rather wold he ȝeuen / with-oute doute
Vn-to his pore parisshyns / a-boute
Line 488
Of his offryng / and eke of his substance
he coude in litil / thyng / haue suffisance
Wyde was his parissh / and houses fer a-sonder
But he left nouȝt / for reyn ne for thonder
Line 492
In sekenesse and in myschef / to visite
