he was a verray parfyt/ practisour
The cause he knew / and of his harm the rote
A-non he ȝaf / the syke man his bote
Line 424
fful redy had he / alle hise appoticaries
To sende him draggges / and his lettuaries
ffor eche of hem / mad other for to wynne
her ffrenshipe / was nat newe / to bygynne
Line 428
wel knew he / the old Esculapius
And deiscorides / and eke Rusus
Olde ypocras / and Galyen
Serapyoun / Raȝis / and Auyȝen
Line 432
Auuerrois / Dasmacien / and Costantyn
Bernard / Gatisden / and Gilbertyn
Of his diete / mesurable was he
ffor he was / of no superfluite
Line 436
But of gret norisshyng / and digestible
his stody was but litel / in the bible
In Sangweyn / and in pers / clad with-alle
lyned with taffata / and sendalle
Line 440
And ȝet he was but esy of dispence
ffor he kept þat he wan / in the pestilence
ffor gold in phisyk / is a ccordiall
Therfore he loued gold / in especiall.
Line 444
A good wyf þere was / of beside bathe [¶ the Wyf of Bathe]
But she was somdel def / & þat was skathe
Of cloth makyng / she had swich an haunt
That she passed hem / of ypris & of gaunt
Line 448
In all the paryssh / wyf was there non
That to offryng / a-forn hire shuld gon
And if there dide / serteyn so wroth was she
That she was oute / of al charite
Line 452
Hire kerches / were of fyn ground
I durst swere / they weyed doun a pound
That on the Sonday / were vp-on hire hede
hire hosen were / of fyn skarlet rede
Line 456
fful streite teyed / and shoon moist & newe
