And many a breme / & many a luce in stue
wo was his coke / but if his sauce were
Poynaunt and sharp / and redy al his gere
Line 352
his table durmaunt / in his hall alwey
Stod redy couered / al the long day
At the sessiones / there was he lord and sire
fful often tyme / he was knyght of the shire
Line 356
And an Anlaas / and a Gipciere al of silk
Heng at his girdil / as whyt as morwe mylk
A sherewe had he be / and a Countour
was nowher swich / a worthy vauasour
Line 360
An haberdassher / and a Carpenter [¶ An Haber|dassher]
A webbere a dighere / and a tapicer [¶ A Carpenter]
And they were clothed / alle in oo lyuere [¶ A webbere]
Of a solempne / and gret fraternite [¶ A Dighere]
fful fressh and newe / her gere pyked was [¶ A Tapicer]
here knywes were nouȝt / chaped with bras
But al with siluer / wrouȝt ful clene and wele
here Girdeles / and here pouches / euerydele
Line 368
wel semed ich of hem / a fair Burgeys
To sitte in the ȝildehalle / vp-on þe heye deys
Euerych for the wysdom / that he can
was shaply to be / an Alderman
Line 372
ffor catel hadden they I-nough and rent
And eke here wyues / wold it wel assent /
And ellis serteyn / they weren to blame
It is ful feyr / to be cleped Madame
Line 376
And go to the vigiles / al byfore
And haue a Mantel / rially bore [folio 7b]
A Coke they had / with hem for þe nones [A Coke]
To boyle the Chikenys / with the Maribones
Line 380
And pouder Merchaunt / tart / and Galyngale
wel coude he knowe / a draught of london ale
he coude / roste / sethe / boille / and frye
Make Mortrewes / and wel bake a pye
Line 384
But gret harm was it / as thouȝt me
