Justice had he be / ful often in assise
Both by patent / and pleyn comissioun
ffor his science / and his heigh renoun
Line 316
Of fees and robes / had he many on
So grete a purchasour / was nowher non
Al was fee simple / to him in effect
His purchasyng / myght nat ben / in suspect
Line 320
Nowher so besy a man . as he there nas
And ȝet he semed / besiere than he was
In termes had he cas / and domes alle
That fro þe tyme / of kyng will / weren falle
Line 324
Ther-to he coude endyte / and make a thyng
Ther coude no man pynche / at his writyng
And euery statut / coude he / pleynly by rote
He rod but homely / in a Medlee Cote
Line 328
Girt with a seynt of silk / with barres smale
Of his array / telle I / no lengere tale
Affrankeleyn þere was / in this compaignye [¶ A ffran|keleyn]
whyt was his berd / as is the daysye
Of his complexion / he was sangweyn
Line 333
wel loued he by the morwe / a soppe in vyn
To lyue in delyt / was euere his wōne
ffor he was Epiours / owen sone [folio 7a]
Line 336
That held opynyon / that pleyn delit
was verray / felicite parfyt
An housholdere / and þat a gret was he
The grettest / of al his contre
Line 340
his brede his ale / was alwey after one
A betir wyned man / was nowher none
with-oute bake mete / was neuere his hous
Of fyssh and flesch / and þat so plenteuous
Line 344
It sewed in his hous / of mete and drynke
Of alle deyntes / þat eny man coude thynke
After the sondry sesons / of the ȝere
So chaunged he his mete / & his sopere
Line 348
fful many a fat partrich / had he in mue
