ffull semly after hir mete she raught
Line 136
And sekerly she was of grete disport
And full plesaunt and amiable of port
And peined hir to countrefeit chere
Of court for to be statelyche of manere
Line 140
And for to be holde digne of reuerence
And for to speke of hir conscience
She was so charitable and pitous
She wold wepe yf þat she saw a mous
Line 144
Caught in a trap yf þat it were dede or bled
Of smale houndes hade she þat she fedde
With rosted flessh or mylk and wastell brede
But sore wepte she yf ony of hem were dede
Line 148
Or yf men smote it with yerde smerte
And all was conscience and tendre herte
ffull semely hir wymple pynched was
Hir nose tretise hir yen grey as glas
Line 152
Hir mouthe full small and þer-to softe and rede
But sekerly she hade a feire forehede
ffor hardely she was nat vndregrowe
It was almost a span brede I trowe
Line 156
ffull fetyse was hir cloke as I was ware
Of small corall about hir arme she bare
A peire of bedes gauded all with grene
And þere-on hyng a broche of gold full shene
Line 160
On which was first write a crowned A [Eg. 2726 folio 3a]
And after amor vincit omnia
An other nonne with hir hade she
That was hir Chapelyn and prestes iij
Line 164
A monke þere was a feire for þe maistry
An outryder þat loued venery
A manly man to be an Abbot able
ffor many a deinty hors hade he in his stable
Line 168
And whan he rode men myght his bridell here
Gyngelyng in a whistelyng wynde as clere
And eke as loude as doth þe Chapell bell
