He carf byfore his fadre at the table
Line 100
Ayoman hade he and seruauntes nomo
At þat tyme for hym lyst to ryde so
And was all cladde in cote and hode of grene
A sheef of pecok arowes bryght and shene
Line 104
vndre his belt he bare full thriftyly
Wele coude he dresse his takle and yomanly
His arowes drouped nat with fedres lowe
And in his hande he bare a myghty bowe
Line 108
A not hede he hade with a broun visage
Of wode craft wele koude he all þe vsage
Vp-on his arme he bare a gay braccre
And by his syde a swerde and a bokelere
Line 112
And on þat other syde a gay daggere
Harnest wele as sharpe as pointe of spere
A christofre on his brest of silver shene
An horn he bare · þe baudryk was of grene
Line 116
A foster he was sothly as I gesse
There was also a nonne a prioresse
That of hir smylyng was full symple and coy
hir grettest othe was but by seint Loy
Line 120
And she was cleped madame Eglentyne [Eg. 2726 folio 2b]
ffull wele she song the seruice devyne
Entuned in hir voyse full semely
And frensh she spake feire and fetysly
Line 124
After þe scole of Stratford at þe bowe
ffor frensh of Parys was to hir vnknowe
At þe mete wele taught was she with all
She lete no morsell fro hir lyppes falle
Line 128
Ne wet hir fyngers in hir sauce depe
Wele koude she cary a morsell and wele kepe
That no droppe ne fell vp on hir brest
In curtesye was set full moche hir lest
Line 132
Hir ouerlyppe wyped she so clene
That in hir cuppe þere was no ferthing sene
Of grece and whan she hade dronke hir draught
