This ilk worthy knight hade be also
Line 64
Somtyme with the lord of Palacye
Ageyns an other hethen in Turkye
And euermore he hade a soueraigne pryse
And though he were worthy he was wyse
Line 68
And of his port as meke as a meide
He neuer yit no velany seide
In all his lyf vn-to no manere wyght
He was a verrey perfite gentell knight
Line 72
And for to telle you of his array
his hors was gode but him self was nat gay
Of fustyan he wered a gepon
All besmotered with his habergeon
Line 76
ffor he was late come fro his viage
And went to do his pilgremage
With hym þere was his son a yong squyer
A lovier and a lusty bacheler
Line 80
With lokkes crull as they were leyde in presse [Eg. 2726 folio 2a]
Of xx yere of age he was as I gesse
Of his stature he was of even lengthe
And wonderly deliuere and grete of strengthe
Line 84
And he hade be somtyme in chiuache
In flaundres Artoys and in pycarde
And born hym wele as of his litell space
In hope to stonde in his lady grace
Line 88
Embrouded was he as yt were a mede
All full of fressh floures white and rede
Syngyng he was or floytyng all the day
He was as fressh as ys the monthe of May
Line 92
Short was his goun with sleves longe and wyde
Wele coude he sit an hors and feire ride
he coude eke songes make and wele endite
Iuste and daunce portray and eke write
Line 96
And so hote he loued þat by nyghtertale
He slepe no more þan doth the nyghtyngale
Curteys he was lowly and seruisable
