Page 129
(Man of Law's Head-Link.)
et Incipit prologus Legis periti;
Oure Host saw wel / þat the bright sonne
The ark of his artificiale day / hath ronne
The ferthe part / and half an oure & more
And thought he were not / depe I-stert in lore
Line 4
He wist it was / the eight and twenty day
Of Aprill / that is messanger vn-to May
And saw wel / þat the shadewe of euery tree
was as in lengthe / the same quantite
Line 8
That was the body erecte / that causet it
And þerfore by the shadewe / he tok his wyt
That phebus / which þat shone / so clere and bright
Sixe degrees was fyue & fourty clombe on height
Line 12
And for that day / as in that latitude
It was ten of the clok / he gan conclude
And sodeynly he plight / his hors a-boute
lordynggis quod he / I warne ȝow alle this route
Line 16
The ferthe partie of this day / is gon
Now for the loue of god / & of Seynt Iohn
leseth no tyme / as ferforth as ȝe may
lordyngges the tyme wasteth / nyght & day
Line 20
And steleth from vs / what preuyly slepynge
And what þorugh negligence / in our wakynge
As doth the strem / that turneth neuere a-geyn
Descendyng fro the mounteyn / in-to a pleyn
Line 24
Wel can Senek / and many a Philosophre
Bywaylen tyme / more than gold in coffre
ffor losse of catel / may recouered be
But losse of tyme / shendeth vs quod he
Line 28
