ffor which this noble Duke / as he wel can
Comforteth / and honoureth / euery man
Line 2716
And mad reuel / al the longe nyght
Vn-to the straunge lordes / as was right
¶ . Ne there was holden / non discomfityng
But as a Iustes / or a turneyeng
Line 2720
ffor sothly there was / no disconfiture
ffor fallyng nys nat / but an auenture
Ne to ben had by force / vn-to the stake
Vnȝolden / and with / xxti / knyghtes take
Line 2724
O persone a-lone / with-outen mo
And haried forth / by arm foot and too
And eke his steede / dreuen forth with staues
With fotmen / bothe ȝemen & eke knaues
Line 2728
It nas aretted him / no velanye
There may no man / clepe it cowardie
¶ . ffor which a-non / Duke Theseus let crie
To stynten al rancour / and Envie
Line 2732
The gree as wele / of o side as of other
And either side elyke / as others brother
And ȝaf hem ȝiftes / after here degree
And fully held a fest / dayes thre
Line 2736
And conueyed the kyngis / worthily
Ouȝt of his toun / a iourne largely [folio 35a]
And hom went euery man / the right wey
There was no more / but fare wel haue good day
Line 2740
Of this bataille / I wol no more endyte
But speke of Palamon / and of Arcite
Swelleth the brest of Arcite / and the sore
Encreseth / at his hert / more and more
Line 2744
The clotered blod / for ony lechecraft
Corupteth / and is in his bouke I-laft
That neither veyn blod / ne ventusyng
Ne drynk of herbes / may ben his helpyng
Line 2748
The vertue of explyf / or Animall
ffor thilk vertue / cleped naturall
