The Petworth ms. of Chaucer's Canterbury tales. Ed. by Frederick J. Furnivall.

¶ Remedium contra Inuidiam [from the margin]

[515] ¶ Now wil I speke of þe remedie aȝeinst þis foule synne of Envie ¶ ffirst is þe loue of god principal and louyng of hym self and of his neighbour. ffor soþly þat oon ne may not be wiþouten þat oþer [516] And trust wel þat in þe name of þi neighbour þou shalt vnderstonde þe name of þi broþer ffor certes al we han oo fader flesshly. and oo Modere [folio 286b] that is to say Adam and Eve and eke oo fadere spirituel þat is to say god of heuene [517] Thine neiȝboure art þou holden forto louen And willen hym al goodnesse and þerfore seiþ god loue þine neigbour as þine self þat is to say to saluacion boþ of lif and of saule [518] And more ouer þou shalt loue hym in word and benigne amonesynge and chastisynge and conforte hym in his anoyes and prey for hym wiþ al þine hert [519] ¶ And in/ dede þou shalt loue hym in such wise þat þou shalt done to hym in charite as þow woldest men did to þine owne persone. [520] & þerfore þow shalt not done hym no damage ne wikked worde ne harme in his body ne in his catel ne in his saule by entising of wikked ensample. [521] þow shalt not desiren his wif ne noon / of his þingges ¶ Vnderstonde eke þat in þe name of þi neighboure his com|prehended his enemye. [522] Certes a man shal loue his enemye for þe comaundmentz of god And soþely þi frende shalt þou loue in god. [523] I say þine Enemye shalt þou loue for goddis sake by his comaunde|ment.

[6-text p 631] ffor if it were reson þat man shuld hate his enemye. forsoþ god wold not receyue vs to his loue þat bene his enemyes [524] aȝeinst iij manere of wrongges þat his enemye doþ to hym he shal do þre þingges as þus. [525] Aȝeinst hate and rancour of hert he shal loue hym in hert. Aȝeinst chidynge and wikked wordes. he shal prey for his enemye. Aȝeinst þe wikked dede of his enemye he shal doon hym bounte [526] ffor crist seiþ. Loueþ ȝoure enemyes and preieþ for hem þat spekeþ ȝou harme And eke for hem þat ȝou chasen and purswen and doth bounte to hem þat yow haten ¶ Loo þus comaundeþ vs our lord Ihesu crist to doo to oure enemyes. [527] ffor soþly nature dryueþ vs to loue our frendes. And parfay oure enemyes han more nede to loue þan our frendes. and þei þat more nede haue certes to hem shal men doo good|nes. [528] and certes in þilk dede haue [we] remem|braunce of þe loue of Ihesu crist þat deyed for his enemyes. [529] And in as moche as þilk loue is þe more greuous to perfourme so moche is more grete þe merite And þerfore the louyng of our enemye haþ confounded þe venyme of þe deuell. [530] ffor riȝt as þe deuel is discomfited by humilite riȝt so is he wounded to the deeþ by þe loue of oure enemye [531] Certes þan is loue þe medecyne þat chaseth out þe ve [folio 287a] nym of Envie fro mannys herte [532] The spices of þis pas shullen be more largely declared in her chapiters folowinge