[THE PROEM.]
Thise olde gentile bretoynes in her daies
Of dyuers auentures maden laies
Rymeden in her furst bretoyne tonge
Which layes wiþ her instrumentes þei songe
Line 712
Oiþer ellis radden hem for her plesance [folio 178b]
And oon of hem haue I in remembrance
Which I shal seie wiþ as good wille as I can/
But sirs by cause þat I am but a burill man
Line 716
At my bygynnynge furst I ȝou biseche
Haue me excused of my rwde speche
I lered neuere rethorike certeyne
þinge þat I speke it mot be bare and pleyne
Line 720
I slepte neuere on þe mounte of parnaso
Ne I neuer lered . Marchus Tullius ne Cithero
Colours of rethorike knewe I none with-out drede
But such coloures as growen in þe mede
Line 724
Or ellis such as men dye or peynt
Colours of rethorike bene to me queynt
Mi spirit feleþ not of such matiere
But if ȝou lust my tale shul ȝe here [[No break in the MS.]]
Line 728