The Brut, or The chronicles of England. Edited from Ms. Raw. B171, Bodleian Library, &c., by Friedrich W. D. Brie, with introduction, notes, and glossary ...

APPENDIX C.

FULLER VERSION OF THE TIME FROM 1399-1401. Compare p. 361, 1. 16 ff.

[MS. Rawlinson, B. 173.]

[MS. Rawlinson, B. 173 213a] And at Oxonford were take Sir Thomas Blounte, kniȝt, and Benet Cely, knight, & Thomas Wyntershill, Squier. ¶ And these were be-hedyd and quarterd; And the knightes hedes were set on poles, and brought to London, and set on London Brygge; And the quarters sent forth to other places and townes. And in the same yere, at Pritewell, in a Mille in Essex, there was Sir Iohn Holand, the Duke of Excestre, take with the commons of the Contre. ¶ And they brought him from that Mille vnto Plassh, And to the same place þere as King Richard Arested Sir Thomas of Wodestocke, Duke of Gloucestre. ¶ And right there, in the same place, they smote of the Duke of Excestres hede, and brought hit to London vppon a pole, And hit was sett on London Brigge. And in the same yere, at Bristowe, was take the Lorde Spencer þat King Richard hadde made Erle of Gloucestre. ¶ And the commons of the towne of Bristowe toke and brought him into the Marketplace of the towne; And there þey smote of his hede, and sent hit to London, & hit was set on London Brigge. ¶ And in the same yere was Sir Barnard Brokeys, knight, take and Arested, & putte into the Toure of London And Sir Iohn Shelly, [MS. Rawlinson, B. 173 213b] knight, and Sir Iohn Magdaleyn, And William Ferby, persons of King Richard; And þey were arested and put into the Toure of London. And there come the Kinges Iustices, and satte vpon them in the Toure; And þere they were dampned all iiij vnto deth. And þe dome yeue to Sir Barnard Brokeis, that he shulde come on fote from the Toure, þrough London vnto tyborne, And there to be hanged, and his hede smetyn of. And Sir Iohn Shelly, knight, Sir Iohn Magdaleyn & Sir William Ferby, persons, were drawe þrough-oute London to Tyborne, And there honged, and her hedes smetyn of, & set on London Brige.

And in the same yere King Henry sent Quene Isabell

home ayene into Fraunce, the which was King Richardes wedid wiffe, And yaff her golde and siluer And many other Iuellys; And so she was discharged of all her doure in Englonde. And in the ij yere of King Henry the iiijth, was Sir Roger of Claryndon, kniȝt and ij of his men and the Prioure of Launde, and vij freris Minours, and somme maistres of Diuinite, and other, for treson þat þey wrought a-yenst þe King, were drawe and hanged at Tyborne, all xij persones to-gedyr. And þus was here ende there for her treson.

And in the same yere bigan a discencion and a debate in the Contre of Walys, bitwene þe Lorde Grey Riffyn and Owen Glendore, [MS. Rawlinson, B. 173 214a] Squier of Wales. And this Owen arered a nombre of Walshe-men, And kept all the Contre Aboute right strong, and did moche harme, & distroyed the Kinges townes and lordshjppis þroughoute Wales, and robbed and slewe the Kingys peple, both Englissh-men and Walshe-men: And thus he endured xij yere large. ¶ And he toke þe Lorde Grey Ryffyn prisoner, And kept him ffast in holde tyll he was Raunsomed. ¶ And in the iij yere of King Henry, Owen brent a towne of the Erles of March in Walys, þat hight Kinghton. ¶ And on the morowe after Seint Albones day, was the batayle bitwene Sir Edmond Mortymere and Owen; And þis bataile was on the blacke hyll beside Pymaren. And þer Owen toke Sir Edmond Mortymer, þe Erles brother of the Marche, prisoner, and kepte him long tyme in holde; And at the laste he made him wedde one of his doughters, and kept him there styll with his wiffe; and sone after he died. And þan the King, hering And knowyng that myscheffe, distruxion & treson that þis Owen wrought, ¶ Than anone he ordeyned him a strong power of men of Armes & Archers, And moche other stuffe þat longeth to werre, for-to abate and destroye þe malice of these false Walshmen. And whan [MS. Rawlinson, B. 173 214b] the King come into Wales for-to destroye thys Owen and other rebelles, false Walshmen, Anone they fledden into the Mounteyns; And there might no man do hem harme In no maner wise; but often-tymes they toke Kinges Cariage, and euery day destroyed his peple; but Owen and his men for the most party scaped harmeles, For the King ne his meyne might not come by him in no maner wise, for the Mounteynes. And so the King come into Englond a-yene, for lesing of mo of his peple; and þus he sped not there.