(4)
¶ To god, thy wedlok wiþ loue holde,
In brennyng contemplacion,
And make nouȝt hym cokewolde,
To loue in fornycacion.
Line 28
On goddis mercy be not to bolde,
To falle in temptacion.
Kepe charite hot, let it not colde
For quenchyng of deuocion.
Line 32
(5)
¶ Loue all folk in charyte,
Body and soule in good atent,
As þou wolde þey dede þe;
Þat is goddis comaundement.
Line 36
Who breke þo hestes, cursed is he
Til þey come to mendement.
Þou preyest euere-more in all degre
Til þat þou to synne assent.
Line 40
(6)
¶ That þou hast don siþ þou were bore,
All þy lyuyng byþenk þe newe.
Wheþer hast þou more in store,
Or of vices or of vertue;
Line 44
And wheþer hast þou folwed more
Good aungel or wykked, for boþe þe sewe;
Þy countretayle þey wil shewe, þe skore,
In helle or in heuene, [folio 123b] wreten trewe.
Line 48
(7)
¶ Haue mynde, god sente his sone adoun,
Tok mankynde in flesch and felle,
And suffred hard passioun,
Dyed on croys, and heryed helle.
Line 52
Haue mynde of his resurexioun;
Byleue all þis trewe gospelle.
Haue mynde on his Assencioun;
On god his fader riȝt hond, doþ dwelle.
Line 56
