(23)
¶ Iustice is religeon in sete,
Þat demeþ riȝt in all degre.
And queste is religeon, trouþe to trete;
Ȝeueþ eche man, þat his shulde be.
Line 180
A child may wiþ his fader plete,
And ȝut kepe his charyte,
And of his kyng blameles gete
Lawe is so gentyll and so fre.
Line 184
(24)
¶ Þouȝ summe of thy breþeren don a trespas,
He wole amende and do no moo.
Parauenture þou art in þe same cas,
Or after, myȝt ben in suche two.
Line 188
Loke not þat þou hym chace,
Ne sclaundre hym not to haue shame and wo.
Pray god forȝeue hym of his grace,
And kepe þe wel þou do not so.
Line 192
XIX. [God's Appeal to Man.]
[Digby 102, leaf 119, back.] [14 stanzas of 8, abab, abab.]
(1)
In my conscience I fynde,
And in my soule I here and see,
To repreue man þat is vnkynde,
Goddis wordis þis may be:
Line 4
"Man of resoun, haue in mynde,
I made þe lyk ymage to me;
For loue y hadde to mankynde,
I toke manhed, lyk to þe.
Line 8
(2)
¶ Mannys loue y ȝerned ȝore;
Þat loue was in myn herte souȝt.
Mannys loue sat me so sore,
Nas neuere bargayn derrere bouȝt.
Line 12
