Hit is vnlike any lede with his liffe pas,
Syn it is gate with a gode & no gome ellis,
And ye may strive with no stuerne but of your strenght nobill.
Wo shuld pas out of perell fro þo proude exin,
Line 568
Þat with flamys of fyre han so furse hete?
Woso bydis þere bir is brent into askys.
Or þat dragon so derfe, as þe deuyll felle?
There is no gome vnder gode, þat hym greue may.
Line 572
And if ye highly haue het in your hote yowthe,
And folily be ffaryn out of fer londes,
Ȝet turne your entent, & betyme leue;
Wirkes as a wise man, & your wille chaunge,
Line 576
ffor þere is doutles no dede but þe dethe thole."
TH[E] ONSUARE OF JASON TO MEDEA.
The wegh at hir wordes wrathit a litill,
And Swiftly to þat swete swagit his yre.
"A! damsell full dere, with your derffe wordys,
Line 580
What lure is of my lyfe & I lyffe here:
I hope ye found me to fere & my faith breike;
And if destyny me demys, hit is dere welcum
Or it were knowen in my contry & costis aboute,
Line 584
That I faintly shuld fle and þe fight leue;
Among knightes accounted coward for euer,
Me were leuer here lefe & my life tyne,
Þan as a lurker to lyue in (ylka) lond after. [MS. has "ylke a"]
Line 588
I wole put me to perell and my payne thole,
Do my deuer yf I dar, & for no dethe wonde. [folio 11b]
ffor yche wise man of wit, þat wilfully hetis
Any dede for to do, and dernly avowes,
Line 592
Shuld chose hym by chaunce to chaunge out of lyue,
Ere he fayne any faintes & be fals holdyn."
MEDEA.
Medea full myldly vnto þe mon said:—
