Thurghe hardynes of hond hopit to spede;
He put noght vnpossible pelleus wordes,
Ne the kynges couetous cast not before:
Þen he grauntis to go with a grete chere,
Line 260
And all thies fferlyes to fraist he fursly awouet.
PELLEUS
Pelleus of the proffer was proude at his hert,
And glad of þe graunt before the grete lordys;
He ertid to an end egurly fast,
Line 264
Þat no tarying shuld tyde ouer a tyme set;
And þet ffortune vnderfonges þat he feile shall,
And will put hym fro purpos þat he presys after.
He consydret þat Calcos was closet in an yle,
Line 268
Þat no creature might keuer for course of the see,
But with ship þat shapon were for þe shyre waghes.
Þan he comaundet to come of þe crafte noble,
A wright þat was wise þis werke for to ende;
Line 272
And Argus þat after was abill of his crafte,
Sone he dressit to his dede & no dyn made,
And made vp a mekyll ship, þe most vpon erthe,
Þat after hym awne selfe Argon was cald.
Line 276
Sum sayn full sure & for sothe holdyn,
Hit was þe formast on flete þat on flode past,
Þat euer saile was on set vpon salt water,
Or euer kairet ouer cost to cuntris O fer.
Line 280
Now ordant was althing onestly þere,
And abundantly broght þat hom bild might,
With all stuff for þe stremes, þat hom strenght shuld.
Mony noble for þe nonest to þe note yode,
Line 284
Tryed men þat were taken of tessayle rewme,
To this Journey with Jason, as the gest tellus: [folio 6b]
All entred into Argon after anon.
