The xxxiiij Boke: how hit happit Vlixes aftur the Sege.
[folio 200a]
Vlyxes the Lord, that lurkyd by nyght
ffro the Cité to the see, as I said Ere,
When Thelamon, with tene was trayturly slayn,
Line 13108
All bare in his bed & blody beronen,
With two schippis full schene, þat þe schalk hiret,
He come vnto Crete as þe course fell.
All his nauy full nobill naytly were lost,
Line 13112
And refte fro the rynke, as I rede schall.
Telamon tor son toke hym with hond,
He refte hym his riches & his renke schippis,
And wold haue honget þe here vppon hegh galos;
Line 13116
But hit auntrid Vlixes vne for to skape,
Thurgh wiles & wit wan of his hondis,
And past of his pouer to pouert ynugh.
Of all his wallond wele walt he no gode,
Line 13120
And þof he passit with pyne þe pouer of hym,
Ȝet happit hym full hard in a hond qwile.
The noble kyng Naule naytly hym toke,
And purpost with pyne to put hym (o) lyue, [MS. has "on lyue"]
Line 13124
ffor the tale of the treson, I told ȝow before,
Of the prise kyng Palomydon, his aune pure son;
But thurgh wilys & wit he wan of his daunger.
Vnpairit of his person priuely he stale. [folio 200b]
Line 13128
