Hit shalbe sentto your-selfe, seche hit no ferther:
Þan hope may ye hertely, to haue in a while
The Cité and the soueran, sese as you likes.
Line 11704
But kepis this in councell, for cas þat may falle,
Þat no wegh in þis world wete of our cast;
And I will kaire to the kyng for a cause yet,
And feyne me with fare to forther our werkis.
Line 11708
I will telle hym with trayne, þe trist of our ernde
Is holly in his hond hengand aboue.
I haue knawlache in þe case & comyng with yow,
What sommys in certayn þe sent you to take."
Line 11712
Thus with lowtyng & leue the ledis depertid;
The grekes agayne ar gon to þere tenttes;
The traytur full tomly turnyt to þe kyng,
His falshed to forther: the fend hym distroy!
Line 11716
THE ORDINAUNCE OF THE TRYBUTE.
Than carpis to the kyng curset Antenor,
All the Cité to assemble hym-seluyn before.
When comyn were the knightes, comyns, & all,
Thes wordes he warpit þo worthy vnto:—
Line 11720
"I haue comynt in this case, knowith hit your|selfe;
To the grekes bus vs gyffe, to graunt vs for pes,
Twenty thowsaund thristy, þrungyn to-gedur,
Markes full mighty, all of mayn gold, [folio 178b]
Line 11724
And of Syluer, for-sothe, the same þai dessyre:
To whyte vs, of whete, qwarters þai aske
X. M. þroly, to thring in hor shippes."
This oponly is ordant þo odmen betwene,
Line 11728
And specially spokyn to spede hom away,
Be a tyme for to take, & turne to þe sea.
Gedrit was the goode, & gon for to kepe
To Sure men & certen þat sowme to deliuer,
Line 11732
And take sikernes sad the Cité to leue,
Of the grekes agayne for the grete somme.
